Letra Alptraum eines opportunisten Bap

Alptraum eines opportunisten

Ich kohm ahn ne Buhrehoff un ich wohr unwahrscheinlich mööt.
Ich daach: "He hällste eez ahn, fröchs dä Buhr he noh nem Bett." Ich roofen: "He, do drinne, ess do irjendeiner doheim?" Dobei stund ich op dä Trapp, un ich hatt ihßekahle Bein.
Do kohm dä Buhr eruss, un ich daach, ich weed beklopp, denn dä Kääl, dä hatt en Scheeß, die heelt mir vüür minge Kopp.
Ich fallen op de Knee un benn am ziddere vüür Angs un saare: "Buhre fing ich joot, öm Jotteswille, leeve Mann!" Do entsichert dä sing Scheeß un fäng laut ze brülle ahn: "Vun "IX-Ypsilon" weiß ich, dat mer keinem traue kann." Ich saare: "Leeve Mann, mir künnt ihr traue.
Ich söök nur e Bett.
Usserdämm studier ich Jura op der Universität." Dann kohm sing Dochter russ un säht: "Gestatten, heiße Rita." Ich kräht direk ruude Uhre vun wäjen "Dolce vita", denn su ne "Schoß" hatt ich he bei dä Kappesbuhre nit erwaat.
Och dä Vatter vun dämm Mädche wohr üvverhaupt nit staaz.
Für mich enzeschmeicheln, säät ich: "Levve Mann, ihr sidd op Zack.
Üch mäht keiner flöck jet vüür vun dämm janze Rattepack.
En der "Jungen Union" benn ich" - do luhrte intressiert.
Dadropp hann ich met dämm Buhr en Veedelstund politisiert.
Ich säät: "Farbentragen bring et, Mensuren schlagen och!" Koot jesaat, ich kräät dat Bett, nur versprechen moot ich noch, dat sing Dochter für mich Luff wöhr, sons kräht ich met ihm Zoff, denn schließlich hieroht dat dä Mattes, dämm jehührt dä Nachbarhoff.
Un sing Köh sollt ich melke nächste Morje koot noh vier.
Ich säät: "Affjemaht, levve Buhr, ich versprech et dir." Alles klar, mer jinge penne un et woor ald koot vüür zehn, do kohm et Rita ahn ming Bett un säht: "Ich möchte mit dir gehn! Nimm mich mit, zeig mir die Welt und ich zeige dir dafür, wat alles unger mingem Naachthemp loss ess." - ich kunnt nix dofür.
Ich denke: "Scheiße, flöck eruss he!" Zoröck hielt mich dann nur dä jottverdammte zweite Teil vun dämm beknackte Schwur.
Denn dämm sing Köh ze melke hatt ich ihm versproche vüür zwei Stund, denn do kunnt ich noch nit wesse, wie jetzt et Rita vüür mir stund: Huhe Affsätz, Strappse, Netzströmp, transparentes Negligé.
Levve Herrjott, loss dä Buhr nix merke, bitte hör mein Flehe! Doch dat woor nix met dämm Bedde, denn op eimohl woot et hell un minge Buhr stund en der Düür un säht: "Dat ess he kei Hotel! Un dat Flittschen - Rita meinte - sick wann ess dat ald bei dir?" Öm en affzelenke, säht ich: "Kohl ess Kappes, Strauß e Dier, Alfred Dregger ne Verbrecher un dä Löwental en Sau.
Levve Buhr, maach keine Wind, schließlich ess dat Kind en Frau!" Besser hätt ich dat jelosse, dann wöhr alles nit passiert, denn ming Ablenkungsmanöver woor doch ärsch improvisiert.
En dä Eile hatt ich mich verdonn un alles falsch gemaht, ävver klevver wie ich woor, hann ich dann noch flöck jesaht: "Meister Proper fing ich prima! Adenauer, dä hatt rääsch! Inge Meisel an die Macht!" Dobei woot et mir dann schlääsch.
Un schon fing ich ahn ze kozze.
Dobei hann ich noch erwähnt, dat ich Leutnant der Reserve wöör em Garderegiment.
GSG 9 heeß dä Laade, un do köhm nur dä erenn, dä ne echte deutsche Kääl ess, wie ich ess eine benn.
"Zäh wie Leder, hart wie Kruppstahl, wä ne Windhund övverhöllt, un wä blond ess, blaue Aure hätt", hann ich dämm Buhr verzällt.
"Wenn dat su ess", säht dä Buhr, "Jung, dann will ich nit esu sinn: Nächste Sonndaach weet jehieroot, sulang blievs do he drinn." Un su woot et och jemaht.
Sick dämm liej' ich ahn der Kett, un et Rita ess ming Frau, un dä Buhr, dä ess jetz nett.
Ich bin Schützenkönig, Bürjermeister, Kirch-Chor-Dirigent, un dat alles nur, weil unsereins nit jähn em Freie pennt!